عجبى

[Basha Egypt]

عجبى !!

عجبى على الأيام أنقلب حالها
الناس ماشيه تايهه ليه كده مالها
بتدور على قوتها وقوت عيالها
وان رزقها الرحمن حمدت وشكرت
وقالت يا رب انهارده عدى وبكره دبرها

عجبى على دموع فى عيون طفل مالياها
ما شافش من الدنيا غير مآسى قلبه لم ينساها
عجبى على الشاب والعجوز اللى تاهوا عن مرساها
الشاب شاب قبل الآوان والعجوز ماسك فى الدنيا ولم يسلاها

عجبى على قلوب دبلت من ظلم الناس ليها
وعيون اتحجر الدمع فيها
وأيادى لم تتمد بالعون لو حتى قطعناها
يا عالم ليه كدا العجب كله فينا
ده احنا خلائف ربنا الأرض أتخلقت لينا
نسينا معنى وجودنا دمرنا أمانينا
عجبى علينا يا زمن أتمسخت معانينا

[Basha Egypt]

يااا اللي انت غاوي تسمع كلام موزون ..اسمع كلام المصري فى الموال
اول القول نسمي الله ونصلى ع النبي المختار... ده اجمل كلام يتقال
زمان قالوا ياللي انت غاوي صحبة الطريق. صاحب الادب والرجال
انا بقولك خير الصحاب حرمة.. ليها حرمه.. واجدع من كتير من الاندال
ده كلام مر وقاسي.. لكن قسوته من افعال البشر اللى لايتاقلوا بصفيح ولا مال

المصري قاعد على شط الاسمر النيل
قاعد بيحكى عن ابو زيد وسعد اليتيم فى المواويل
علم الكلام بيبتدى بالكلمه الطيبه د ي فن اصيل
يارب... وفق خطاوي المخلصين ده انت رب جليل

الحلوة قالت تاخد الاسمر أبو الحنة أسواني وطبع خيال
يجيب ديله دهب ومكحلة والمهم عنده عيشه حلال
يقول ياعين تلحقه هى وتغني ياليل فى الموال
دي فى عينة قمر يحميها بالجاه والمال
أصله ياعم بيحبها وفى عينه ست الحسن و الجمال

المصري فاتح للصبر يجي ميت دكان كلهم ع النيل
وغاوي السهر جنب السمرا في المواويل
والسمرا اللى عشانها صبر وعدى الصعب فى ليالي الويل
الحلوة مصر ام البلاد والعباد والسواقي والغيطان والكحله والمنديل

[Basha Egypt]

محلى الاسى ينغزل موال يتغنى
يسعد شقانا وتضحكلوا مدامعنا
يا ناس لولا الوجع و الجرح واللوعه
كانت حياة البشر كلمه بلا معنى


قالوا زمان في المثل ان الدهر دولاب
لا العز دايم ولا الاموال والاحباب
بالامس يا والدي كنت القمر في الدار
و اليوم نجمك إتوحد في النهايه وغاب



من حبر عمري كتبت الشعر والموال
من دم جرحي رسمت الفرح والامال
يا صاحب الآه لا تبكي ولا تشكي
قد ايه ظلم انهدم و اتغيرت احوال



يا سامع الصوت بلغ للعرب صوتي
اني بلاقي على سيف الامل موتي
ما بين وردة سلاحي و خنجر الاحزان
يتمرد الخوف و يرعد ف الفضا سكوتي



يا مشتري الموت....بايع للوطن عمرك
يا مخوف الخوف.....حافر ف السما ذكرك
لما بلغنا خبر ان فى حضن الموت اسرك
صار الزمن عيد ميلادك و الوطن قصرك



أنا مذهبي الصبر واصبر حتى على تارى
و اطعم شباكي و صنارى بصباري
أنا أعوم على الصبر لما أوصل لأوطارى
و الصبر دا مركبي والقلع والصاري